طول عمري

أنا طول عمري عندي أوضة كراكيب
خزانة مليانة حاجات
دي عروسة قطن مهترئة كل ما أخيطها من ناحية تتفتق من الناحية التانية
بس لسه محتفظة بيها لأنها أول عروسة تعملها لي أمي
لما شادية جارتنا اتجوزت أختها خدت من المنجد حتة قطن كبيرة وخلته يفصل لها جسم عروستين جمال قوي وحشتهم قطن لمروة وزينب بناتها
بالليل وأمي وشادية و أختها و مرات عمي قاعدين على العتبة يدردشوا في ضي القمرة
كانت البنتين بيلعبوا بالعروستين ويغيظوني
عيطت لأمي وقلت لها عايزة عروسة زيهم
قطعت حتة قماش من جلبية قديمة ومدت إيديها لحشو المرتبة المفتوقة من الجنب ومليتها قطن وخيطته
ورسمت بقلم الكحل عينين ورموش وحواجب .. وقالت لي ولا تزعلي .. ورسمت بقلم الشفة شفايف مضمومة .. زي ما تكون مستنية بوسة من حد
وإيه دي كمان ... ده بيت بلاستيك صغير اشتراه لي ابويا من قدام أم هاشم لما زرناها زمان فيه كوبايات صغيرة وحلة ومعلقتين
وأنا كنت بعمل عروسة وعريس من الطين ولا العجين وأدخلهم البيت وأغني ليهم يوم فرحهم
وساعات كنت بخليهم يخلفوا عيال صغيرين
وساعات كنت بخليه يضربها زي ما ابويا كان بيضرب امي
بس كنت بعرف اخليها تغضب وتسيب له البيت لغاية ما ييجي يصالحها
لكن امي كانت تكتم دموعها وتروح هي اللي تصالحه وهو يكشر في وشها ويقول لها روحي حطي لي الطفح
اما ده ..آه .. ده كلوب صغير برتينة محروقة كان ابويا جابه من مولد السيد البدوي
شا الله يا شيخ العرب ... كل فترة انضف قزازته واخليها بتبرق .. بس عمري ما غيرت له الرتينة المحروقة
وده كرسي زان بتلات رجول ورثته امي عن ستي
وده .. يووووو .. التراب مغطي الحاجات .. يظهر لازم اسيب الكتابة واروح انفضها وارتبها لاني كل فترة لازم ارتب حاجاتي وكراكيبي القديمة ...